Coa lexislatura case esgotada, a prometida ampliación da Rede Natura, ao igual que o Plano de Ordenación do Litoral, vai ter que agardar. Medio Ambiente leva dous anos vendendo unha ampliación da Rede Natura que poría a Galiza ao nível doutras comunidades en territorio protexido. Na proposta oficiosa avanzada, chaman a atención uns "curiosos ocos" no litoral protexido só explicábeis ao superpoñer a planificación eólica e acuícola. En Corrubedo, o "espazo" da piscifatoría da Laxe Brava, 308.000 m², figuraba en 2007 incluido dentro do LIC para caerse da proposta en 2008. E hai máis "baleiros" en Quilmas, Merexo, Camelle, Ribadeo... MARCHANDO UNHA REDE NATURA Á CARTA! Baixa a presentación A REDE NATURA LITORAL (3.57 MB)

Polo que respeita á ampliación da Rede Natura, ADEGA ven demandando dende hai case 8 anos unha ampliación acorde coa riqueza de hábitats e especies de interese europeo en Galiza. O actual 11,9% do territorio galego protexido baixo esta figura, o máis baixo do estado agás Melilla e lonxe da media española do 25,5%, supón un agravio e unha eiva intolerábel para un país que ten unha das máis ricas biodiversidades de Europa.

E é precisamente no litoral onde a proposta (oficiosa) de ampliación da Rede Natura á que tivo acceso ADEGA amosa significativos “ocos” e esquecementos só explicábeis se superpoñemos a planificación acuícola e eólica. Parques eólicos como o “Albariño I” en Oia ou “Muxía II” esquivan a afección aos novos espazos protexidos aproveitando uns sospeitosos “baleiros” convintemente axeitados para garantir a tan publicitada “afección cero”. No primeiro caso, o novo LIC “Serra da Groba”, que en algúns puntos ten apenas 100 m de ancho, semella facer “slalom” entre os muíños eólicos que, casualmente caen sempre fóra do espazo protexido.

ADEGA reclama do conselleiro Sr. Vázquez que presente oficialmente unha proposta de ampliación da Rede Natura 2000 coerente e desvencellada dos intereses empresariais e de calquera estratexia político-eleitoral. Unha Rede Natura á altura dos valores naturais do país, patrimonio de todos/as e non deseñada para proveito duns poucos. E que o faga de xeito urxente antes do final da lexislatura para non ser complice da estratexia de saqueo do país que promoveu a anterior administración cando deseñou unha Rede Natura a medida das piscifatorías, eólicas, minicentrais, etc.