A xente achegábase curiosa a mirar con atención iso que ían mostrar os rapaces de Silfocamps na praia de Area Maior de Malpica de Bergantiños, a posibilidade de comprobar por si mesma o que tanto se ve nas nosas costas nos últimos anos, era o SURFING DAY.

Foron moitos os que probaron por vez primeira a sensación da flotabilidade dunha tabla na auga e incluso o tacto dun neopreno como segunda pel térmica. Os nenos acumulábanse na beira agardando o seu turno, ninguén quedou sen a súa oportunidade.

Despois dun dia de sol intenso e vento moi frouxo, o calor quedou acumulado nas pedras do paseo marítimo, onde á noitiña unhas brasas para os xurelos acompañaban outra posta de sol propia desta nosa Costa da Morte.

Despedindo o sol e alumiando as primeiras estrelas soaba na rúa, fronte a escola de surf, a banda musical “Os Fresquiños” ata chegada case a media noite.

Unha proxección dun vídeo inédito grabado na mesma praia de Malpica, nesas mesmas rúas aló polo ano 84, deixaba abraiado os cambios visibles producidos polo crecemento e  paso do tempo neste pobo.

Un dia perfecto,un dia de surf.

Texto: Antonio Varela Amado