O francés Edouard Delpero e a italiana Ginger Caimi conquistaron este venres o GADIS Longboard Pro Ferrol, disputado na praia de Esmelle, nunha xornada con ondas de entre dous e tres pés que puxo o broche final á tempada 2025/2026 da World Surf League (WSL) Europa. Ambos os dous surfistas coroáronse tamén campións europeos de longboard, asegurando a súa clasificación para o World Longboard Tour (WLT), que comezará o próximo mes.
Tras finalizar a competición de longboard, a atención trasladouse ao GADIS Junior Pro Ferrol, onde se completaron as dúas primeiras roldas do cadro masculino e a primeira rolda feminina. A competición continuará este sábado coa primeira chamada prevista para as 8:30 horas.
Edouard Delpero logra por fin a vitoria en Ferrol
Despois de dúas finais consecutivas en Ferrol sen conseguir o triunfo, Edouard Delpero puido finalmente inscribir o seu nome no palmarés da proba galega. O francés chegaba coa obriga de gañar para optar ao título europeo de longboard, e respondeu cunha actuación impecable desde os cuartos de final ata a gran final.
Delpero destacou pola combinación de potentes xiros, transicións fluídas e un excelente dominio do noseriding, confirmando o gran momento de forma co que afronta o regreso ao circuíto mundial.
"Foi un reto volver competir coa nova xeración. Quería demostrar que seguía aquí e que podía gañar. Síntome moi ben e é unha gran forma de comezar a tempada", declarou Delpero.
A final masculina ofreceu un gran espectáculo coa presenza de Ben Skinner (Gran Bretaña), Jon Garmendia González (Euskadi) e Louis Marchiset (Francia). Skinner e Garmendia tomaron inicialmente a dianteira, pero Delpero reaccionou cunha excelente onda puntuada con 8,50 puntos, a mellor da final, que lle permitiu remontar e asegurar tanto a vitoria na proba como o título europeo.
O francés regresa así ao World Longboard Tour, onde iniciará a súa campaña polo título mundial no US Open.
Ginger Caimi revalida o título en Ferrol
Na categoría feminina, Ginger Caimi confirmou todos os prognósticos. A italiana chegaba como líder do ranking tras vencer na primeira proba do circuíto europeo e demostrou unha vez máis o seu enorme potencial.
Con só 14 anos, Caimi continúa facendo historia. A campioa foi mellorando o seu nivel en cada manga ata asinar unha brillante actuación na final. Comezou cunha excelente puntuación de 8,17, mantívose sempre na cabeza da clasificación e sentenciou o triunfo cunha última onda valorada en 8,27 puntos.
A vitoria permítelle defender con éxito o título conseguido en Ferrol e conquistar ademais o seu primeiro campionato europeo de longboard.
"Síntome moi feliz. É o meu primeiro título europeo e aínda non o podo crer. Tiña moitas ganas de gañar esta final. Había algo de presión por volver clasificarme para o World Tour, e cando vin que a miña primeira onda recibira un oito, dixen para min mesma que tiña que seguir empurrando ata conseguir a vitoria", explicou Caimi.
A surfista italiana pecha a tempada cun pleno de dúas vitorias en dúas probas, consolidándose no primeiro posto do ranking europeo por diante da francesa Alice Lemoigne, mentres que a británica Emily Currie, segunda en Ferrol, empata coa francesa na segunda posición da clasificación final.
