A pasada fin de semana do 22 e 23 de agosto, logo de numerosas xestións con diferentes entidades e patrocinadores, celebrouse o I Trofeo San Lourenzo de Surf e Bodyboard na Praia de Rapadoira, en Foz ( Lugo). O Clube Surfiños, que engloba a un grupo de afeccionados - apaixoados - por este mundo do surf e o bodyboard plantexouse organizar este campionato local con ánimo de perdurar no tempo.
Javi buscando o tubo
A pesar dos atrancos iniciais, fundamentalmente debido á falta de ondas os días 15 e 16 de agosto, datas nas que inicialmente estaba previsto realizar esta proba, este clube focego conseguiu, finalmente, celebrar a proba, que contou cuns trinta inscritos en total, entre ámbalas dúas categorías: a de surf e a de bodyboard.
Javi
Na mañanciña do sábado 26 celebráronse as primeiras mangas coa presenza dun grupo de xuíces pertencentes a diferentes federacións de península, entre os cales estaba Zurdi, xuíz internacional de surf e cunhas boas – e moi desexadas – ondas, tendo en conta que o verán foi escaso en canto a oleaxe.
Carlos
Cada manga estivo bastante disputada, tanto en surf como en body, e o espectáculo foi digno de ver. Os participantes fixeron gala das súas mellores manobras e tentaron aproveitar a forza das ondas ata o final.
Os espectadores tamén foron en aumento ao longo da mañá, de maneira que ás dúas da tarde, cando se celebraron as finais, a Praia da Rapadoira estaba ateigada de xente que seguía con moito interese o desenvolvemento da proba.
Juanry
En torno ás 14:30 h moitos dos participantes decidiron tamén participar na Expresion Session, vinte minutos cheos de bonitas manobras tanto de surfers coma de bodyboarders. Para esta hora o mar xa baixara demasiado e facer algún xiro espectacular era xa difícil. Ás 15 h, tanto participantes coma membros da organización compartiron comida e risas nunha carpa instalada cerca da zona da competición.
Jairo nunha baixada complicada
Poucas horas despois, a media tarde, fíxose entrega dos trofeos aos diferentes gañadores das diferentes categorías, que foron:
Modalidade de Surf:
Álvaro Jiménez (1º); Jairo Barral (2º), Lorenzo Arzani (3º) e Juanry Prendes (4º)
Modalidade de Bodyboard:
Diego Cuervo (1º); Javi Pazos (2º), Luis Culís (3º) e Carlos Gil (4º)
Expresion Session:
Álvaro Jiménez (na modalidade de surf) e Xavitri (bodyboard).
Os premios consistiron en diferentes agasallos surfeiros (coma gorras, táboas...) máis unha cantidade en metálico que oscilou entre os 120 € do primeiro clasificado e os 50 € do terceiro.
Para finalizar o campionato, a festa e o bo rollo celebráronse pola noite dous concertos na zona das Torres de Foz con bastante éxito de público.
DJ Andrés
O Clube Surfiños, contentos polo éxito desta primeira proba, segue a traballar para a edición do vindeiro ano, que promete ser mellor e máis espectacular.
Moitas grazas a tódolos participantes e a tódolos patrocinadores, entidades e amigos que colaboraron neste evento.
Boas ondas
Texto de Juan Carlos Couto.
Web do Surfiños: http://www.clubsurfinhos.es/
