O surfista vasco e a súa compatriota impuxéronse nas finais masculina e feminina dunha edición que incorporou por primeira vez a praia de Razo ao calendario internacional absoluto das Qualifying Series da World Surf League.
O Edommo Surf Pro Razo 2026 pechou este domingo cun dobre triunfo español. Yago Domínguez e Ariane Ochoa destacaron nunha competición marcada polas difíciles condicións do mar e confirmaron o seu gran momento de forma nunha cita que reuniu algúns dos mellores especialistas europeos.
Na final masculina, Yago Domínguez impúxose ao francés Thomas Debierre cunha puntuación total de 14,17 puntos fronte aos 12,17 do seu rival. O surfista vasco mostrou un gran nivel durante toda a xornada decisiva, cun espectacular aéreo de backside que lle valeu un 8,67, a mellor onda da final. A súa experiencia no Challenger Series resultou determinante para controlar a presión e conquistar a súa primeira vitoria nunha proba QS.
Na categoría feminina, Ariane Ochoa superou por unha estreita marxe á tamén vasca Janire González Etxabarri, segunda clasificada do ránking europeo. Ochoa sumou 11,83 puntos fronte aos 11,44 da súa rival, grazas a unha onda decisiva de 7,00 puntos nos últimos minutos da final. A surfista confirmou así a súa progresión internacional tras os seus recentes bos resultados no circuíto.
Cambios importantes no ránking europeo
A competición tamén deixou movementos relevantes nas clasificacións europeas. Na categoría masculina, o británico Lukas Skinner ascendeu ao primeiro posto do ránking QS tras a eliminación de Francisco Ordonhas, mentres que Yago Domínguez subiu ata a cuarta posición.
No cadro feminino, a portuguesa Maria Salgado conserva o liderado, con Janire González Etxabarri segunda e Ariane Ochoa terceira.
Razo consolídase no mapa internacional do surf
A cuarta edición do Edommo Surf Pro supuxo un salto cualitativo para o campionato, que este ano se incorporou por primeira vez ao calendario internacional absoluto da World Surf League (WSL), dentro das Qualifying Series, cunha dotación de 2.000 puntos nas categorías masculina e feminina.
As vitorias de Yago Domínguez e Ariane Ochoa poñen o broche de ouro a unha edición que sitúa Razo no primeiro plano do surf europeo. A praia de Carballo reforza así a súa proxección internacional e confirma o potencial de Galicia para acoller competicións de máximo nivel.
