Aquí tedes un novo vídeo co resumo da competición do Campionato de España de Surf Adaptado 2022 celebrado a finais de Setembro na praia de Patos, en Nigrán, Galicia.
A Federación Española de Surfing, xunto coa Federación Galega de Surf e o Quenlla Surf Clube levaron de novo a Galicia o Campionato de España de Surf Adaptado. O sábado 24 de setembro foi o día sinalado para disputar o título nacional das 7 modalidades que compoñen o parasurfing. Unha competición que volveu demostrar o momento doce que vive esta disciplina.
Máis de corenta deportistas vindos de todas as partes da xeografía española encheron a area da praia galega nunha intensa xornada. Nunhas condicións nas que os surfeiros tiveron que tirar de afouteza, proclamáronse campións de España algún dos rostros que veremos no mundial ISA que se disputará en Pismo Beach, California.
Na categoría Visual Impairment 1 revalidou, por oitava vez consecutiva, o título de campión de España, Aitor Francesena “Gallo”. O zarauztarra leva desde o 2015 conquistando un título que o eleva á figura de lenda deste deporte en España. Na categoría feminina, a asturiana Carmen López levaría novamente o máximo galardón nacional. En Visual Impairment 2, o galego, e debutante na competición Dani Souto levaría o seu primeiro título como campión de España.
Doutra banda, na modalidade PS Prone 1, onde cada vez aumenta o número de participantes de maneira exponencial, conquistaría o cetro nacional o canario, de nacionalidade alemá, Antonio Müller. Ademais, en Prone 2 os vencedores serían dous dos claros candidatos a estar na ansiada lista do mundial, Sarah Almagro e Ángel Curiel.
As modalidades de PS Caseta 1 e PS Caseta 2, tamén coñecían aos seus novos vencedores. En PS Caseta 1 o novo campión de España sería Ibon Gurrutxaga. E, en PS Caseta 2 serían Mireia Cabañés e Xabier Ayestarán.
Xa para finalizar, na disciplina de PS Kneel, os galardóns que lles certificaban como mellores de España serían para, un novísima pero xa veterana neste deporte, Audrey Pascual e en categoría masculina estreábase como campión Ibon Oregui.
